شباب سوريا الرياضي..

شباب سوريا الرياضي.. أكتوبر 29, 2008

Posted by decemberforever in مشاركات من أصدقائي.
trackback

رح إحكي عن منتخبات سوريا بكرة القدم والسلة:
أنو ليش منتخباتنا الوطنية للفئات العمرية الصغيرة بتكون ناجحة وبترفع الراس ولما يكبروا ويصيروا رجال بصيروا ِبخجلوا
دائماً منتخبنا لكرة القدم بشارك بكأس آسيا للشباب والناشئين ,ومابتكون مجرد مشاركة عابرة دائماً كانوا يلعبوا منيح ويجيبوا نتائج منيحة ومشرفة, والدليل أنو كان منتخبنا للشباب مشارك بكأس العالم للشباب الأخير مشاركة رائعة وفازوا وقتا على ايطاليا إلي معظم لاعبينا صاروا بأهم الأندية الايطالية والعالمية ..وتأهلنا عالدور التاني وطلع من حظنا نلعب مع البرازيل وفازوا علينا بضربة جزاء مانا صحيحة أبدا وسجلا رافينا إلي عم يلعب مع شالكة الألماني والمنتخب البرازيلي الأول …بس كانت مباراة حلوة وكنّا الأحسن وبعد البطولة إجا لشبابنا عروض من أندية أوربية بس للأسف فرقنا الموقرة ما سمحولن يلعبوا خارج الحدود عأساس يستثمرون بأرض الوطن ويحافظوا عليهن …!!وبعد حوالي السنة أغلب اللاعبين قعدوا عالبنش وانتسوا….
ومنتخبنا الناشئ لعب بكأس العالم الأخير وكان أكثر من رائع وتأهل للدور التاني وطلعنا مع اسبانيا البطلة .

ومنتخب السلة للناشئين تأهل بجدارة وبروعة ع كأس العالم
أنو هيك شباب صغار ليش ما بحافظوا عليهن وبيرعوهن للمستقبل ليش لما يكبروا بيخربوا؟؟؟
هون لازم إحكي عن الدور الكبيرللاتحاد الرياضي بتخريب المنتخب الأول
حيث بتبلش السرقة والنهب والهبش وكل واحد هموا يعبي جيبتو وبس… وأخر همن المنتخب, هاد غير المحسوبيات والفساد وطق البراغي وأحلى شي لما بشيلوا واحد بحطوه بمكان تاني المهم يضل يسرق.. ولك أعضاء الاتحاد إلهن أكتر من 20 سنة نفسن ما تغيروا بس بيبدلوا بالكراسي,
وهلق منتخبنا الناشئ لعب بكأس آسيا وكان بجنن ومنتخب الشباب رح يلعب قريباً بكأس آسيا أما الرجال بتحلم تشوفن عم بنافسوا عالتأهل ولك مجرد منافسة وبلا تأهل
ولك صرنا نتمنا ما يكبروا هالشباب لحتى ما ينتزعوا خلين هيك شباب رافعين الراس ومفرحينا شوي!!